A simple village style Yummy Mushroom Fry

வணக்கம் அன்பர்களே,

         இன்று நாம் காணவிருப்பது காளான் வறுவல்.

         காளான், நமக்கு கடைகளில் கிடைக்கிறது. அவை விதையிடப்பட்டு, செயற்கையான அதற்கேற்ற தட்பவெப்ப சூழலை உருவாக்கி வளர்ப்பவை.

         கிராமங்களில் வயல்வெளிகளிலும், தோட்டங்களில் மழைகாலங்களில் மறைவான இடங்களில் ஆங்காங்கே தானாகவே வளர்ந்து அழகழகாய் மொட்டு மொட்டாய் வளர்ந்து, அதை பார்க்கவே சொர்க்கம் போல காட்சியளிக்கும்.

          அதை பறித்து வந்து, கிராமத்து மக்கள் தங்கள் வீடுகளில் கறிக்குழம்பு போல் அதை செய்து உண்பர். அசல் கறிக்குழம்பு வாசம் கமகமக்கும். சாதாரணமான வறுவல் செய்து உண்பர். அவ்வளவு சுவை அதில்.

           இன்று அதே வாசத்தை நான் உங்களுக்கு விருந்தளிக்கிறேன். விருந்துக்கு வாருங்கள்....

                   காளான் வறுவல்

தேவையான பொருட்கள்:

காளான்- 200கிராம்

கடுகு, உளுத்தம்பருப்பு- 1 தேக்கரண்டி

சி.வெங்காயம்-15

கருவேப்பிலை- 2 கொத்து

கொத்தமல்லி- சிறிதளவு

மஞ்சள் தூள் - 1/4 தேக்கரண்டி

மிளகாய்தூள்- 1 தேக்கரண்டி

உப்புத்தூள் - 1 தேக்கரண்டி (அ) தேவைக்கேற்ப

எண்ணெய் - தாளிக்க

காளான் சுத்தம் செய்தல்:

1.காளானில் அதிகபடியான மட்துகள்கள் இருப்பதால்,ஒரு பாத்திரத்தில் தண்ணீரை ஊற்றி அதில் காளான்களை இட்டு அலசி, பின் ஒவ்வொரு காளானையும் எடுத்து, மொட்டுப் பகுதியை உள்ளங்கையில் தேய்க்க, வழுவழுப்பான மேல் தோல் வந்துவிடும். அதை முழுமையாக சுத்தம் செய்து எடுத்துக்கொள்ள வேண்டும்.

2.ஒரு பாத்திரத்தில் தண்ணீரை ஒரு கொதி அளவுக்கு சூடாக்கி, அதில் 2 நிமிடங்கள் காளான்களை போட வேண்டும்.

இதன்மூலம் நச்சு தரும் பூஞ்சைகள் இருந்தால் இறந்துவிடும்.

சுடு நீரை நன்கு வடிகட்டி காளான்களை தனியே எடுத்துவிட வேண்டும்.

செய்முறை:

1.வாணலியில் சிறிது எண்ணெய்‌ ஊற்றி, காய்ந்ததும் அதில் கடுகு, உளுந்து போட்டு உளுந்து பொன்னிறமாகும் வரை வதக்கவும்.

2. பின் வெங்காயம், கருவேப்பிலை சேர்த்து வெங்காயம் நன்கு வதங்கி கண்ணாடிப் போல் ஆக வேண்டும்.

3.பின் அடுப்பை சிறு தீயில் வைத்து மஞ்சள் தூள், மிளகாய்த்தூள் சேர்த்து தீராமல் கிளர வேண்டும்.

4.பின் காளான் மற்றும் உப்புத்தூள் சேர்த்து

மூடி வைக்க வேண்டும். காளானிலிருந்து வெளியேறும் தண்ணீரே போதுமானது.

5. 3-4 நிமிடங்கள் கழித்து மூடியை எடுத்து

தண்ணீர் முழுவதும் சுண்டும்வரை அவ்வபோது கிளறிவிட வேண்டும்.

6. தண்ணீர் முழுவதும் சுண்டிய பிறகு, அடுப்பை அணைத்து விட்டு, பொடியாக நறுக்கிய கொத்தமல்லி தழையை தூவி இறக்கவும்.

நாவின் அரும்புகளுக்கு இனிதே சுவையூட்டும்‌ "காளான் வறுவல்" ரெடி.

நீங்களும் செய்து பார்த்து, உங்கள் கருத்துக்களை பகிர்ந்து கொள்ளுங்கள்...

நன்றி நண்பர்களே!!!....

                                                          -லிடி